男朋友有車無樓嫁不過


係身邊發現,原來有好一部份同年齡的朋友都沒有車,但相反一些年紀輕的朋友卻已經有多年車,更加有D已經係以玩車為樂,換車的次數可能比我買樓仲要多,實在充滿驚喜同疑惑。


令我有呢個諗法的係因為一個朋友的男朋友,大約也是27-28歲左右,月入應該萬五到萬八左右,最近就換左部BMW二手開蓬,咩系列我就無追問,但係據聞每月供5000蚊供4至5年,車價即係20-25萬左右,一聽到呢度,我就同呢個朋友講的意見係呢種男仔玩就好,嫁你就唔好搞了。


在香港養車其實都算是一個高消費的興趣,先唔好計車價本身幾錢,一架最平CC牌費一年去你5000幾,停車場cheap cheap地一個月當你2000,保險一年又當你大約2400,即每月200,每個月fixed cost大約你去2600左右。好啦,買得架車緊係要楂,一個月楂多楂少自己預,但當你保守估計三四缸油,當你1000蚊一缸,攞個中間數當你3500,出街泊車+隧道費當你一個月500蚊,即係每個月總數都用你大約6600蚊。


不過仲有好多數你無得預,如你唔好彩果個月比人炒兩三張牌就又去你1000(睇你衰咩),而且如果你買二手有咩要整啊,一年換兩三次偈油果D,平平地都又當你10000-20000一年,最大穫一間high花人地就麻煩,以我的經驗話比我聽,一個月唔計車價本身,好易駛你8000蚊。


所以,計番以上呢位朋友的case,每月洗8000蚊養車,5000蚊一個月供車,每月基本支出13000蚊。不過你可能會話咁如果佢賣車都仲有價值,之不過你用一架二十幾萬的車玩4-5年,玩完后可能車價跌到落80000左右,即係供完個價預左跌,而且車越老越多野整,我計到你當無車價都其實不足為奇 (四五年整80000野一點都唔難)。


好啦,數就計左出黎,咁呢個男仔搵15000-18000一個月,洗就洗左你13000一個月出去,每月剩番2000-5000蚊,想問下佢洗唔洗食飯?難聽D講基本開支我都唔知佢點搞,隨時可能要靠食老本甚至借錢渡日,到佢可能過兩三年加人工時,都可能只係還番前兩年的數,就算唔係還債,儲到的錢都可能係3-5萬,如果唔係屋企開金礦的話,膽敢問一句將來如何時好呢?


呢個男仔27-28歲,供甩架車都要32-33,到時銀行戶口春都無條,27-28歲時開住蓬就緊係型啦,但到你32-33歲,女朋友開始講現實要結婚要生活,呢個男仔除左架老左五年的車,仲有D咩剩?或者到時真係中左六合彩都唔定,之不過我理解的係一般玩車玩到癲過籠的人,中左六合彩都係買多D parts去改車,除非你一注中9000萬后又有阿媽迫你買樓,如果唔係呢種人的思維都係會累死佢。


所以,我同呢個女仔講我話如果你係玩下就無所謂,坐佢架車型一兩年都幾OK,但認真的話,你就一係要諗下佢會唔會改,又或者佢會唔會係一個奇才將來可以突然勁富貴,否則到最后只會係你死路一條。可惜,中左毒的女永遠都係盲目的,希望佢會早日醒番。


財務自由的天書話比我地聽,養車係支出,買樓收租係收入,所以奉勸大家一句,未買樓先買車的男仔,只宜短炒,不宜長楂,否則一定輸死你;不過輸錢都事少,輸時間先慘,做女仔的你們謹記。

留言

  1. So how about those young people who are saving for their mortgage down payment while owning a car at the same time? They dont have a flat yet, they re gonna have one, and they have been very disciplined on spending (even the spending in car ownership is within his saving plan)... Are they one of these guys that girls should not be marrying to?

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力