高收息組合


樓市升到今時今日的呢個歷史性高位,對於坐左佔比例重貨的隊長而言,不得不再諗究竟下一步的部署該如何,特別係睇到再買下去的回報相對成本已經不吸引的時間,未來賺取的收入係咪應該要尋求其他出路呢?


成個迷思最開端係來自於目前樓價升至400萬時的成本實在太高而開始,假設下一間要買入的樓係400萬,DSD已經18幻了,加上佣金就會係22幻,仲未計如果當要係咁易執一執間屋才放租,連雜費當大小小講去到30幻咁講,呢30幻的投入對比400幻收租樓的3.5-4厘回報,實在唔太吸引。之前買係因為睇住200-350幻你仲有得搏向上的升幅,而時至今日就算升至450幻咁講,隊長都有物業食呢一浸,一样會笑到gap gap聲。反之,呢家如果要買400幻樓仲要投入可能一半的樓價,即200幻再+30幻的成本,用共230幻黎睇而賺取3-4厘回報,其實唔係太吸引。


無樓的人條數係諗法唔一样,因為你要計埋個住的成本。但當你發現你的N+1比唔到果種回報同埋只係多一間屋時,就開始諗係咪應該搵其他野投資。


接下來引伸的問題係其實未來的收入,不管係人工同租金,都係應該保守去玩,始終隊長諗住唔買下去的同時,手頭上仲係楂住好多樓而且好L多mortgage,有咩事都要呢Buffer黎救命。思維黎講係以樓為主攻的,所以未來收番黎的錢其實係一舊救命資金,亦即係係隊長眼中呢一舊錢係以防守性為主,當然一方面又希望有回報,但又唔可以太take risk,所以接下來就有以下的投資要求:


1. 任何黑天鵝情況下都起碼可套現 [至關重要]
2. 相對要穏陣,唔望無限回報,但在可預期的就算黑天鵝範圍內都應該唔會沒頂。
3. 高息回報以增加現金流。
4. 流通性要高及透明。


係眾多的投資項目裡,有唔同的可能性包括直債同高息股等等,不過一講其他野呢度就會有無數的專家跳出黎,所以我就唔作深入的討論邊一個投資工具係最好,特別係有好多人都會因為隊長唔講樓以外的野就當隊長係無知,所以隊長亦廢事講解太多隊長的投資背景同知識,即管就當隊長係一條盲毛的同時,隊長就直接跳去結論就係好大機會以高息股+期權去建構另一個防守組合。


有睇開我個Blog的人都知隊長不嬲都唔鼓勵人炒股,原因係一方面好多人都係無discipline咁去買,即好多人成日有錢就手痕要入貨,賺左又要入番去再買,買到輸為止時就止蝕,所以好多時輸的機會係大好多。而且,好多人因為輸錢就會買更高風險的產品,包括牛熊,所以一講股票隊長就好怕令人贏粒糖輸間廠,呢样野係樓宇可以杜絕的人性缺陷。


然而,自股市大時代結束後,其實好多股票已經有好高的收益率,像大約一年前隊長有講過買內銀的時間,而家仲維持係5.5%-6.5%的回報之間,而如果你買港燈呢D上下波幅都係10%左右的收息股,回報仲可以去到7%以上,所以如果以收息黎講,其實槓杆一倍買樓(隊長個case係得一倍,無計)賺3.5%,其實同唔槓杆零負債收7%差唔多,呢下都幾吸引。不過仲有一個分別係攻守問題。


係文章開波的時間隊長已指出其實仲係以樓宇為攻,所以我唔介意買防守性無大志的收息股,就算股價一年後唔太升唔太跌,都袋佢7%係相當唔錯。套入而家買400萬樓的情況下要有230萬資金,而其中30萬係必輸的成本,理論上楂住呢舊錢係有約15%的buffer。


呢個思維的基礎下係你要有樓去配合操作,而且手頭上預期的資金係合理。舉個例好多人炒股都係十萬廿萬咁炒,叫你安安定定買隻7%回報的公用股,一年賺一萬幾千好多人會嫌少唔夠喉,轉而就會去買更高波幅的股票希望賺取更高回報。反之隊長係諗你未來五年十年都唔買樓計,當中當係有一間兩間屋的首期,即假設你有5球10球現金,果7%就係講緊幾十萬幾十萬咁去,呢個就唔同諗法。


而且呢一個組合的操作其實同隊長的MPF操作有比較類似的諗法,當你認為係已經比較吸引時就全部買入,然后係相對認為股市進入瘋癲後有10-15%回報時就以Short call黎食期權金,只要你唔做任何naked short,理論上呢個組合係無得沒頂的,除非你認為阿爺會比金融之母的銀行爆,又或者香港無左港燈供電咁講。所以預期就算有黑天鵝事件要套現,係無槓杆情況下最多都係以discount賣出,流通性應亦無疑問。


下一步的諗法係等股市再跌乾淨D,但呢一個組合看來會係未來幾年的一個重要投資。








留言

  1. 隊長你好,我對期權很有興趣。你在上文提到:

    當你認為係已經比較吸引時就全部買入,然后係相對認為股市進入瘋癲後有10-15%回報時就以Short call黎食期權金,只要你唔做任何naked short,理論上呢個組合係無得沒頂的,除非你認為阿爺會比金融之母的銀行爆,又或者香港無左港燈供電咁講。所以預期就算有黑天鵝事件要套現,係無槓杆情況下最多都係以discount賣出,流通性應亦無疑問。

    可以說具體點嗎?

    投資新丁

    回覆刪除

發佈留言

此網誌的熱門文章

被退休的CEO

DSE題三: 專精一事還是多元人生

大圍車位的潛力